Æfingaleikurinn og áminningar!

Æfingaleikirnir við FH gengu vel. A-liðið sigraði 3-1 þrátt fyrir að hafa verið töluvert frá sínum besta leik. Góðir kaflar inn á milli skiluðu sigrinum en ég og stelpurnar sem spiluðu í dag með A-liðinu vita það að liðið getur spilað betur.

B-liðið tapaði 3-6 sem að ég á erfitt með að skilja þar sem ég fylgdist með fyrri hálfleiknum í þeim leik og þá voru allar í liðinu að spila glimrandi vel, voru gríðarlega duglegar og voru yfir 2-0 eða 2-1 í hálfleik. Hugsanlega voru þær einfaldlega of duglegar og sprengdu sig eftir fyrri hálfleikinn? Engu að síður góð frammistaða þar.

Í C-liðinu var slatti af stelpum sem eru nýbyrjaðar að æfa og voru líklega að spila sinn fyrsta æfingaleik í fótbolta. Þrátt fyrir það stóðu allar sig mjög vel, hlupu mikið og gerðu sitt besta sem er það mesta sem þjálfarinn getur krafið nokkurn leikmann um. Margar í þessum hópi geta með meiri æfingu orðið mjög góðar í fótbolta.

EN ÞÁ AÐ ÖÐRU ALVARLEGRA OG VERRA MÁLI!

Ef það verða fleiri dæmi um það að einhverjar skrifi niðrandi og neikvætt um einhvern eða eitthvað hérna á síðunni þá verð ég fljótur að loka öllu spjallinu og möguleikanum á því að skrifa athugasemdir.

Reglan á þessari bloggsíðu verður frá og með nú þessi:

AÐEINS ATHUGASEMDIR SKRIFAÐAR UNDIR NAFNI ERU LEYFÐAR. ÖÐRUM ATHUGASEMDUM VERÐUR EYTT SAMSTUNDIS!